öli cüntàfen una
di Vittorio C. 25-10-2023
öli cüntàfen una
Stadoma ciàpi sü ol sach celèst dèla carta, ca tégni chiló defò èn terazza, e 'ndóo gió 'ndèla masù a svöidal gió ndèl bidù nöof, chèl col cuèrc' bló.
Olsi sü ol cuèrc' e'nchèla sènti 'na usina ca'l par ca la mè salüda, propi 'n fìli de öos quasi 'n cìp cìp. Sóo rèstàat 'mpóo coma chèl dèla maschèrpa ma pó me sóo règordàat vargót dèl micro-cip.
Pugi 'n'atem ol sach e ciàpi scià ol bidù e cuminci a cercàa, voltel, pirlel e rebaltel fina sótsura ma mi chèl puinàal dè'n cìp cìp, gnàa bao. Sóo cunvint ca'l sè piacàat deréet a 'na quai crespa, orès dìi magare a cüntàla con quai scimès, a chìi bao ormai i va dapartüt, i spüzza gnàa pü e i sè fà ité con tüc', basta truàa de cüntala e stà al còlt.
Ala fìi ho pó rebaltàat ité ol sach e me'n sóo vardàat bée de miga lagàl gió 'nsèma ala carta, al tégni par ol rüut parché chi nigri ai pó a vignìi scars.
A idìi chi quatro schérp col cuerc' colorat ilò 'nfila, ià cuntra la presef dèli vachi ca li ghè ca pü, lè fìna èn piasé; iscé a la masù la me rènt pó vargó, se paga püsé ontera a l'IMU.
Olaresi miga truam sensa masù coma vargüu ca i ghà nóma ol garasc par la machèna ca la ghè stà giüsto da parlée sensa nient òtro, 'nghée ca i'è mètarà chi póor bidù ?
Par stasira cìp-cìp a tüc'
voglio raccontarvi
questa mattina prendo il sacco della carta, che tengo qui fuori in terrazzo, e vado giù nella stalla a svuotarlo nel bidone nuovo, quello con il coperchio blu.
Alzo il coperchio e nel mentre sento una vocina che pare mi saluti, proprio un filino di voce quasi un cip cip. Sono rimasto stupefatto ma poi mi sono ricordato di qualcosa del micro-cip.
Appoggio un attimo il sacco e prendo il bidone e comincio a cercare, voltalo, giralo e ribaltalo perfino sottosopra ma io di quel uccellino del cip cip, nemmeno l'ombra. Sono convinto che si è nascosto dietro a qualche increspatura, vorrei dire magari a contarla con qualche cimice, anche quegli animaletti ormai vanno ovunque, non puzzano nemmeno più e si intrattengono con tutti, basta trovino di contarla e stare al caldo.
Alla fine ho poi ribaltato dentro il sacco e me ne son guardato bene di non lasciarlo assime alla carta, lo tengo per la spazzatura perché quelli neri potrebbero scarseggiare.
A vedere quei quattro contenitori colorati lì in fila, là contro la mangiatoia delle mucche che non ci sono più, è perfino un piacere; così la stalla mi rende qualcosa, si paga più volentieri anche l'IMU.
Non vorrei mica trovarmi senza stalla come qualcuno che ha soltanto il garage per la macchina che ci sta giusto da sola senza niente altro, dove li metteranno quei poveri bidoni?
Per questa sera cip-cip a tutti.
