I PASTÓR AL PARLAMÈET DE L’EUROPA

Setèmbre, ‘ndèm. L’è ura òl pòst da cambiàa,

adès en tèra dèl Belgio me da migràa:

ma àa de Ginèer, Feorèer, Màrs, April,

me rifà ‘sta matocada: gnàa da dil!

Stès mestéer a Mac’, Giugn, Lüi e Aóst,

ca quant ca l’è gió ol sùul, l’è fósch,

e àa de Otóri e Noèmbre l’è própi bèll

tornàa da Strasburgo, fina a Brüzzèl;

par miga parlàa dèl mìis che rèsta

ca già da par lüü, par metà l’è fèsta;

da laoràa, i trüa mai òl momènt,

i è sempri èn viac’, al Parlamènt!

Adès, trìi dì i-è già pasàac’, l’è ùra,

i-à da svegliàss dendomàa a bunùra,

par lagàa de Strasburgo la montagna

e ‘ndàa gió a Brüzzèl ca ‘l màar la bagna;

l’è ‘na gran discesa, ö Dio bèl,

cènt-trenta metri de dislivèl:

vintisèt dì, iló i arà da pasàa …

sensa bétoli a portada de màa!

Già i süa: parchè i-à réet la cà e ‘l téc’

quant ca i va dal paés nöf a chèl véc’:

montagni de valìis (cantines li vée ciamadi)

de formài, vìi e ducuménc’ ‘ncalcadi.

Prüma dè ‘nviàs, i à biüüt a sadéli

Sciató e Sciampàgn sóta li stéli,

iscé ca ‘l saór di früc’ de la tèra

al pòrtes penséer de pàas e miga de guèra.

E i va contéec’ par ‘sta campagna desèrta,

i pènsa tüc’ al bèl früt de la trasfèrta,

ca dói ólti al mìis la sgunfia ‘na paga,

ca già daparlée la slarga la braga!

Adèss i-è ruàac’ ‘ndè la strada principàal:

dè fiànch òl màar, còl so litoràal,

e tüc’ nùu pégori che ‘nghè bat li màa,

sensa idìi chèl ca ‘ndèl cù ‘nsé réet a ciapàa!

Ah, che bèl sa àa mi sarìs ‘nsèma lór,

e ‘nvéci dè vès l’àsen, fós òl pastór!