Sentéer stupáat
di Vittorio Crapella - 13-06-2018
Sentéer stupáat
Sentéer ormai stùp, e pensáa ca 'n bòt i pasàva col càr a portáa fò 'l vendül e pó a 'l carbù.
Vardáa, adès coi cavéi grìis, chèla bàita 'ndùa da pìscen gh'ò pasáat táac' dì e táati nóc', 'n pìt de magù 'l vee sènsa ulil.
Nóma 'l rümóor del Liri l'è restáat cóma ilùra, tüt 'l rest 'l par tornáat en máa a la natüra, li piànti i'è ignüdi sǜ dapartüt e te vedet pü gnáa 'n práat.
El me vée i mèt quànca dendómáa se vedeva l'umbrìa ca la vegneva en gió da l'òtra part dèla montàgna en de chi pòoch spazi sènsa pianti en dèl bósch, se vedeva ià i camósc a maiáa scià l'èrba prüma che i vés a piacàs pèna i vedeva 'l sùul.
E la sìra, quànca 'l cuminciàva 'l scür dèla nòc', che bèl pudìi scoltáa tüc' i canc' o i vèrs de cèrti animài, 'l caorabèsol, 'l tululùu, la sciguèta e sèmpre da lontáa 'l Liri ca 'l portava la sùa acqua gió par la val, laigió en dèl piáa tra Caiöl e 'l Bosàgia.
Ah, cóma 'l sàrìs bèl püdìi tórna rèdès e giügáa amò 'n bòt ...
(Vittorio C. - 13-06-2018)
I póm de Zapèl
Sentiero chiuso
Sentiero ormai chiuso, e pensare che un tempo passavano con i carri che portavano fuori la neve ghiacciata ed anche il carbone.
Guardare, adesso che ho i capelli grigi, quella baita dove da piccolo ho passato tanti giorni e tante notti, un po' di nostalgia viene senza volerlo.
Solo il rumore del Livrio è rimasto come allora, tutto il resto sembra tornato in mano alla natura, le piante sono cresciute ovunque e non si vede più nemmeno un prato.
Mi viene in mente quando al mattino si vedeva l'ombra che scendeva dall'altra parte della montagna e in quei pochi spiazzi senza piante del bosco, si vedevano là i camosci brucare l'erba prima che si nascondessero all'arrivo del sole.
E alla sera, quando cominciava il buio della notte, che bello poter ascoltare tutti i canti o i versi di certi animali, il succiacapre, il gufo, la civetta e da lontano il fiume Livrio che portava la sua acqua giù per la valle, laggiù nel piano tra Caiolo ed Albosaggia.
Ah, come sarebbe bello poter tornare bambino e giocare ancora una volta ...
